Çavên xwe bigrin; bifikirin ku gava dibêjim Pîzza çi tê ber çavên we? Yê min hevirekî li gorî nanê tisî hebkî şêrin û li ser jî penêr, sucix, salam hwd.

Tu car li ser pizzayan meraqeke min a zêde çênebûye lê car caran min xwariye. Şaxên wan markayên mezin li Mêrdînê jî hene, mîsal Domino's, mîsal Pasaport Pizza. Li wan deran gava ez menuyê vedikim û dixwazim siparîşa pizzayê bidim, dibînim ku li gorî melzemeyan her diguhere navên pîzzayan. Ez hê li tiştekî cuda rast nehatime di vê meselê de, li Qezê pizzaya bi qelî û bi bacanên hişkkirî hatibû çêkirin, ya herî balkêş ew bû bo min. Xeynî wê; malzemeyên klasîk ên dikeve nav pîzzayan, hûn jî dizanin jixwe.

Lê gava em çûn Kafroyê, 2 menu hatin ber me, yek pizzayên her tim her demsal çêdibin, yek jî li gorî sebzeyên demsalê hatiye binavkirin û tê çêkirin.



Helbet dîrekt a li gorî sebzeyên demsalê hatiyê çêkirin bala min kişand. Me 2 pîzza xwestin, her du jî ji hev cûda bûn, me go em her duyan jî tahm bikin. Piştî ku me sîparîş da, ez çûm ber firneya ku hoste lê pîzza çêdike. 2 dolab tijî hevîr bû û tevî ku di kelekela danê nîvro de em çûbûn, gelek kes hatibûn pîzza bixwin. Li ser maseyên din, kesên ku ji Ewropa hatibûn hebûn. Li yekê jî 4 memûr rûniştibûn, ji bo navrojê hatibûn heya Kafroyê . Gundê Kafroyê, gundekî Suryanan e û ji navenda Midyadê 12 km dûr e, welle xelk ji zikê xwe hez  dike 😂 Em jî bi taybetî ji Qoserê rabibûn û hatibûn. Min ji hoste re go "Gelo îzna te heye ku te temaşe bikim û çend fotoyan bigrim?" go "Tu û kêfa xwe", mala wî ava :)




pîzza çêbû û hat ber me. Min Pizza De Helanzane ( heheeyyyt tîpek di nav navê te bûma :) ) xwest. Di ya min de sebzeyên demsalê ( kundir, bacanên reş, isotê sor ) û goştê mirîşkan hebû û li ser jî yên soskirî hebûn, ew sebzeyan pir bala min kişand û min ew xwestibû .



Erê Pizza De Helanzane ;

Ji ber ku li zaningehê jî li ser nên me gelek ders dîtîbûn, gava min perçeyek rahêşt destê xwe û tekstûra wî nanî dît, min go "Helal be, çi xweş hatiye hêvankirin/mayakirin. Ev yek! Ne şîrîn bû lê têra xwe nerm û teniiiikk bû, fenanî pelê cixareyan. Ev dudu! Kêfa min ji nanê tenik re tê, tabî ev jî zewq e. Paşê  abê tu çawa fikirî ku wan sebzeyan bixî tevî hev? Lihevhatina wan min zehf eciband. Bi kundirê Toriyan re pîzza min xwar û sebzeyên sorkirî qet ne bi rûn bûn. Ew baharatên ku li goştê mirîşkan kiribûn jî pir xweş bû, min ji marîna wê zêde hez kir. Ev sisê. Kêmasiya wê 29 tl bi min gelekî zêde bû ji bo ew pızzaya.

Min li restoraneke pir baş,  ji destê hosteyekî jêhatî pîzzayeke xweş nexwariye. Encax Domino's û Pizza Pizza filan bêvan. Heger kûra dowîz werê bidome zor e lê min dil heye ku biçim Ewropa û bigerim. Ez dikarim werê bibêjim, heya ku ez biçim wan deran û pîzza bixwim, ev pizzaya herî baş bû ku min li van deran xwariye. Dest û milên te sax be hosteyê delal, yên ku çûne li Kafroyê pîzza xwarine, ez li benda fikrên we me jî :) bimînin di xweşiyê de 🌸

Ev çend roj in her ku dikevim kuçeya mala me, bêhna kulîçeyan ( em dibêjin kullor ) tê pozê min. Ew baharatên ku dikeve nav kulîçeyan; cehik, reşik, darçîn û hwd. yek bi yek tê ber pozê min. Ji vê bêhnê diyar e ku ‘eyd nêzîk e.

Li herêma me, bê kullor ‘eyd nabe. Heta ji ber ku rojek berê ‘eydê kullor tê lêxistin, roja erefê re em dibêjin ‘roja kulloran’. Xwarin ne hindik e dostno, heya navên rojan diguherîne. Ya ew çi eziyet bû gidî, heya nîvê şevê em li ber tepsî û firnên kullora bûn û roja ‘eydê şeveqê em radibûn. Di destpêkê de min go kullor tê ‘lêxistin’. Yanî berê ew kullor di tennûran de dihat pêjandin. Loma jî werê tê gotin. Niha firnên elektronîk ên malê rehetiyeke mezin e bo me lê heger hûn bipirsin gelo tehma wê bi qasî ya tennure dibe? na heyran! Lê rehetî zora marîfetê biriye.



Sirra kullorê di beharatên wê de ye. Beharatfiroşê mehla me, kek Bahoz e. Ji Rojava hatiye vir û ev 6 sal in vî karî dike. Min jê pirsî , “Gelo çi dikeve nav hevîrên kulloran?” Got “Em beharatan li cem xwe tevlihev dikin, yên tên dermanê kulloran, yên linavhevxistî distînin. Em 27 çeşîd beharat dixin nav hev; cehik(rezene), darçîn,vanilîn,reşik û hwd. Bo 2 kg. arvan 100 gr. em tawsîye dikin lê yên bêtir dixwaze tevlî bike bi kêfa xwe ye 😊 wekî din şîr û rûn, hûr û şekir jî tevlî dibê; û hevirê wê ne şikeva ye, hewce ye hilatî be. Yanî em êvarê hevîr dikin, sibe zû lê dixin hevîrê hilatî(mayalanmış hamur) û şiklo şiklo dixin firnê.



Li Mêrdîna jorîn ev çend sal in kulîçeyên Suryaniyan (Suryani Çöreği) jî populer bûye. Ferqa kuliçeyên me û yên wan ev e; di nav ên Suryaniyan de xûrme û behîv hene û yên wan hebkî biçûk in.

yên Suryanîkî

Li cem me kullor gula civatên eydan e. Bêyî kullor nabe , her ku çay tê ber mêvanan îlleh sênika kulloran jî li ber e.

Zû de ye min nenivîsî bû , barek maç û hembêzek kullor ji xwendevanên min ên xweşik re.. her di xweşiyê de bimînin .